RAMI alek kanduri tigo hari sabalun rayo aji. Banyak pamuka masyarakat nan tibo. Tampak Mak Inggih pakai songkok kapalo, Mak Andah babaju batiak, Mak Jambang baju ijau lawik, Inyiak Labai bakain saruang, Pekok nan baru pulang batarak.

Ado juwo babarapo urang niniak mamak pangulu adat lainnyo nan tibo jo hati suci muko janiah. Tapi nan jadi urang takamuko hanyo Datuak Kayo. Baliau disambuik jo siriah carano, diduduak an di deretan kurisi basa ampek balai.

Sajak dari halaman sampai ka tangah rumah gadang, baliau dianta diarak jo tapuak tangan. Baitu bana baso basi anak kamanakan Etek Baya mamuliekan baliau daripado tamu undangan nan lain.

Namo Datuak Kayo juwo disabuik baulang ulang dalam pasambahan adat nan dianta langsuang jo suaro jaleh dek Etek Baya. "Tarimokasih banyak Datuak Kayo Pangulu Pucuak Nan Gadang Basa Batuah ateh kadatangan Angku Datuak ka alek kami," kecek Etek Baya sapanuah hati.

Mandanga buah tutua nan bak kian, Mak Jambang nampak agak tarumuak. Takah urang kalah parang, kabek lungga, pasangan guyah, di muko nampak kalihatan. Nan lahia manunjuak an batin. Roman Mak Jambang agak pucek mandanga Etek Baya mamuji muji Datuak Kayo.

Tamasuak Mak Inggih nan jadi Datuak Palo, gali gali sanang mandanga rangkai kato dari buah bibia Etek Baya. "Ambo mintak ka Datuak Palo, musim katibo baiyo batido kito dulu manduduak an parangkat nagari ko. Ijan beko Angku Datuak tulak sajo anggota ambo ampek urang. Ambo mintak parangkat nagari tu, sudah ko, banyak dari kami pado nan lain," mintak Etek.

Kato kato Etek ko mahujam ka dalam hati pangulu pucuak babagai limbago nan hadia. "Ado lo kawan nan ndak sato baluluak, mintak pulo macik cikarau. Dimaa lo adat nan takah itu, " tambah Etek mambuek cameh Mak Jambang.

Sabab Mak Jambang ko cameh, manuruik kaba kaba angin, baliau ko lah mambuek mupakat jo kologa saparinduan, mintak ka Mak Inggih, satantang urang urang nan ka maisi parangkat nagari. Baliau takah takah lah manyusun kurisi. Samantaro Etek Baya ndak dibari tahu.

Mancaliak galagat takah iko, manggarik tangan Etek, bararak buah catua mambuek langkah kudo. Taruah ditambah mandan dituka, kini baliau jo Datuak Kayo bagandiang tangan.

Sakali buah dianjak langsung skak ster. Mak Inggih ndak dapek mailak. Daripado skak mat, biyalah ster jadi korban. Mako mauruik dadolah Mak Jambang jo konco konco. Tamasuak Panglimo Tigo Sarangkai nan salamo ko bak ayam putiah tabang siang dalam maatur nagari.

Adapun di pihak Datuak Gamuak sarato anak anak, mandaman karano ndak diundang Etek makan sarikayo jo lamang tapai. Walau lah datang bana bamanih manih wakatu rayo nan lampau ka rumah Etek, nan kanduri kini tatap ndak sato.

"Banyak nan batanyo, manga inyo ndak diundang. Maklum sajolah, kini nan tadaguak sajo dimintak tibo. Sabab iko cuma baduwah ketek ketek," kato Etek Baya. Samantaro sado pucuak adat di nagari maraso tahormat jikok diundang.

Sasudah alek bakameh, Mak Inggih manjawek tanyo juru tulih. Kalau Etek Baya nan mamintak parangkek nagari musim ka tibo banyak dari anak kamanakan baliau, tantu sajo baliau jadikan sabagai padoman.

Kutiko carito ko diulang Mak Uniang ka Malanca sudah sumbayang subuah pagi tadi, Malanca batanyo, "Mungkin koh takuik Mak Inggih dek Etek Baya tu, Mak?"

"Tantu iyo, Nca. Etek Baya tu dulu nan manyikolakan Mak Inggih sampai akianyo jadi Kapalo Nagari, " jawek Mak Uniang.

"Kalau ndak dituruik an Mak Inggih kandak Etek Baya tu, ba a kiro kiro, Mak?"

"Kalau ndak manuruik an kecek Etek Baya, buah catua Mak Inggih bisa kacau, Nca. Kini ko Inggih diagiah duo pilihan: kabajalan jo urang lain atau bajalan jo Etek Baya!?."

"Apo nan ka tajadi ko, Mak?" tanyo Malanca heran.

"Kito tunggu sajolah, Nca. Iko main tingkek tenggi mah," baleh Mak Uniang sambia jalan malucuih.

Apo mukasuik Mak Uniang ko? kecek Malanca dalam hati. Sabab Malanca ndak ngarati langkah kudo di main catua. Inyo cuma pandai badomino, nan paham jo balak anam mati takapik...

Salamat rayo aji. Maoh lahia batin dari Mak Uniang....