KURENAH AWAK (25)

(25) KURENAH AWAK

Ermanto Tolantang

Wak Balian Martabak, Nyo Masaklo Aia Angek dek Bunda

Dek pagi tadi suasana perdamaian di rumah Awak alah ado, tantulah alamaik badan biko lah ka lalok baliak di ateh kasuah samo jo bunda. Mangkonyo pulang sore ko, Awak bali martabak nan sagadang kuali tu untuak Bunda tersayang.

Sssssswiiiiitttt. Ssssswitttttttttttt. Kalua juo jadinyo kato Bunda tersayang. Dunsanak tau sajolah tembak mukasuiknyo untuak malam biko tu ah.

"Bunda supayo Ayah indak salah bali, Bunda suko martabak mesir atau martabak bandung?" tanyo Awak ka Bunda.

"Iyo lai sabananyo martabak Ayah bali tu dari Mesir jo dari Banduang tu? Biko berang loh Apak ahli bahasa di UNP tu biko," jawek Bunda. Onde iyo lah Awak lo nan salah kironyo. Maklum se Awak lai. Awak bali sajo martabak manih lai. Kok martabak bandung gai kecek nan manjua, tasarahlah.

Lah sudah mandi, duduaklah Awak jo Bunda di kurisi. Dunsanak itulah tando perdamaian ka tatap kami paliharo untuak salamonyo.

"Bunda, buek-an lah aia angek pakai kopi jo gulo tu untuak Ayah ah," kecek Awak.

"Bajaleh-jaleh lah Ayah. Pakai galeh jo piriang atau indak?" tanyo Bunda. Tapaso Awak maangguak sajolai. Biko salah pulo baliak.