(24) KURENAH AWAK
Ermanto Tolantang
Pagi Alah Tabik Rabo, Wak Minta Kode Masuak Waifi, Keceknyo Indak Buliah
Ko pagi-pagi lah tabik rabo Awak ka urang kadai ko. Lah jaleh Awak urang palanggan baru ka mancubo makan lontong jo minum teh talua di kadai ko, Urang kadai ko indak loh balaku sopan jo Awak lai.
Baru taenyak ikua Awak di kadai tu, langsuang tampak tulisan waifi perai. Lah jaleh Awak suko ka nan perai, tantulah Awak minta kode masuak waifi tu ka urang kadai. Sudah tu baru rancana ka mamintak lontong jo teh talua.
"Password-nyo mukasuik Uda yo?" tanyo Adiak tu. Dek mandanga pakai bahaso Inggirih tu langsuang naik darah Awak.
"Diak, jaan sok-sok bahaso Inggirih loh gai. Kalau Awak sampai-an Adiak ka Apak ahli bahasa di UNP tu, pasti Adiak kanai berang mah. Pakai sojolah istilah kode masuak, jaleh dek Awak mah. Jadi jaweklah tanyo Awak tadi. Apo kode masuak waifi kadai ko?" tanyo Awak agak berang untuak maajanyo.
"Indak buliah Pak," keceknyo.
Mandanga jawek inyo indak buliah tu, langsuang manggalagak galang-galang Awak deknyo. Tabik rabo Awak deknyo.
