(23) KURENAH AWAK
Ermanto Tolantang
Supayo Bisa Reuni ka Pikumbuah, Awak Buek Strategi Baru
Dunsanak, Awak agiah tahu sajo nan sabananyo ah, reuni duo hari nan lalu adolah musyawarah reuni nak mancaliak anggota reuni baminantu di Pikumbuah. Sajak diagiah katan ndak bakarambia dek Bunda kapatang, apo lai jauah ka Pikumbuah jaleh sajo indak ka dapek izin dek Bunda do.
Tapi kini lah dapek loh aka baru, dek Awak. Supayo bisa dapek izin pai dek Bunda, Awak kecek-an sajo ka Bunda nak pai mancaliak kawan di Solok. Ayahnyo lah maningga. Dunsanak, alasan Awak tu indak lo salah do. Sabab ayah kawan tu iyo alah lamo maningga. Dunsanak, mangicuah saketek kan indak baa do demi ketentraman dan kedamaian di rumah tanggo.
"Bunda, ko oleh-oleh nan suko Bunda bana mah Ayah bali-an," kecek Awak jo suaro nan elok sarato jo hati nan bangga. Mangkonyo bisa Awak maangkek kerah baju agak tenggi.
Indak lamo sudah tu, dicaliaknyo dek Bunda oleh-oleh tu. Langsuang barubah muko Bunda. Parang dunia katigo pastilah ka dimulai dek Bunda. Awak manjadi heran. Apo juo lai kasalahan Awak ko.
"Ayah, ka mano Ayah tadi sabananyo ko. Lah sajak bilo pulo di Solok tu urang manjua karak kaliang jo manjua galamai ko. Kok co iko, pastilah Ayah lah mangicua pulo baliak mah. Ko pasti Ayah pai ka Pikumbuah mah. Lah mulai acok duto sajo isi kapalo Ayah kini mah yo. Ayah pasti rapek atau marapek-an diri lo di Pikumbuah tu ndak," kecek Bini mancirotet panjang.
"Jaan Bunda capek bana salah sangko bantuak itu," kecek Awak mancubo mambela diri.
