(22) KURENAH AWAK
Ermanto Tolantang
Dek Lah Malam, Wak Baok Martabak Reuni, Malah Bini Berang
Dunsanak, iko tajadi hari kapatang. Awak bareuni jo kawan-kawan saangkatan kelas satu es-em-pe. Sudah makan, kito baehlah bacurito lapeh. Dek lamo bacurito, kiroe hari lah sampai tangah malam. Sansailah badan Awak, alamaik badan ka kanai berang dek Bini mah.
Dek pulang lah tangah malam, sarato nak paubek ati Bini supayo indak berang, ditambah tando Awak sayang ka binilah namoe, sangajo manjalang dakek ka rumah, Awak balianlah martabak tarang bulan angek-angek nan sagadang pinggan tu ah.
Tadi dalam hati Awak, pastilah raso kasanang bana hati Bini Awak. Kiroe tanyato batolak balakang 179 darajat dari nan Awak kiro. Bini Awak berang-berang. Martabak sagadang pinggan tu langsuang dilantiang-an bini Awak ka halaman rumah. Tasirok darah Awak, sarato kerah baju Awak langsuang takulai Dunsanak oiii.
"Apo kecek Ayah? Martabak masih angek-angek tu adolah martabak dari reuni sanjo tadi? Ragu Bunda mah. Iyo lai sabana reuni Ayah tadi ko. Atau Ayah tadi alah rapek pulo. Di mano Ayah tadi rapek atau di mano Ayah tadi marapek-an diri sasudah bareuni tu ah? Martabak balabiah reuni sanjo tu kok masih angek bana sampai wakatu tangah malam ko. Yo hebat martabak reuni Ayah lai yo. Jaan Ayah mancubo-cubo pulo mangicua jo Bunda lai," kecek Bunda sarupo manilanjangi diri Awak jaleh-jaleh.
Lamo Awak tamanuang. Lah tasuduik bana badan diri Awak dek Bunda ko. Indak bisa manggarik badan Awak agak sasenti pun.
Dunsanak, di mano lah salah Awak ko? Niat Awak elok bana nak manyanang-an hati bini, makonyo Awak bali martabak salaweh pinggan tu. Kiroe buruak juo nan dapek.
