(20) KURENAH AWAK
Ermanto Tolantang
Kawan Mintak Izin Pulang Wakatu Rapek, Kiroe Dapek Lamang Angek dek Pak Lurah
Dek lamo bana rapek di kalurahan tadi malam, Awak bae maluncua pulang sacaro diam-diam lewat pintu bagian balakang. Alah labiah duo jam Awak di rumah, tibo Kawan Wak dari rapek maanta-an pipi nan gambuang jo roman muko nan sirah padam bantuak urang sudah kanai berang.
"Kawan, baa mangko pulang lamo bana. Basitungkin bana rapek jo Pak Lurah ma yo," kecek Wak batanyo sambia maangkek kerah baju Awak agak tenggi.
"Baa mangko baitu Pak Lurah tu. Awak tadi mailang sajonyo, walaupun caro Awak tu salah, indak batua, indak jujur, tapi Awak indak kanai berang dek Pak Lurah do," kecek Awak mamanciang Kawan tu baliak.
"Iyo itulah ah. Baa sabananyo dunia ko kini. Ambo nan jujur, mintak izin malah kanai berang dek Pak Lurah. Awak tadi nan indak jujur, indak mintak izin, karajo nan salah malah indak kanai berang dek Pak Lurah. Itu mangko heran ambo jo kaadaan dunia kini," kecek Kawan tu.
"Hei Kawan. Dalam kaadaan dunia nan makin gilo ko. Urang waras bisa sajo dikecek-an gilo. Urang gilo bisa sajo dikecek-an waras. Urang salah alun tantu ka disalah-an lai. Urang batua alun tantu ka dibatua-an lai. Awak dek tau bana jo kaadaan dunia ko, mangko diam-diam sajo Wak maluncua capek pulang tadi. Pasti Awak indak kanai berang do," jaleh Awak.
"Ehe kalepor eh. Lah takicuah Ambo kironyo. Tabaliak-baliak kironyo dunia ko antaro nan salah jo nan bana sarato antaro nan jujur jo nan indak jujur. Kini lah tambah paniang Ambo jadinyo. Lah ragu ambo, siapo nan gilo kini sabananyo ko," kecek kawan Wak tu.
