(19) KURENAH AWAK
Ermanto Tolantang
Sasudah Jumat, Wak Tanyo tantang Honor Imam jo Khatib, Pangurus Berang
Anta di mano pulo Awak tasapo tadi tu, pokoknyo tibo-tibo sasudah salat sunat, mato tacaliak ka pangurus nan maisi papan sadang manulih honor Imam jo honor Khatib Jumat minggu ini. Langsuang Wak caliak kamus bantuak nan disuruah Apak ahli bahasa di UNP tu. Dalam kamus daring tu, tatulih arti honor adolah upah sabagai imbal jasa. Dek itu artinyo langsuang Awak naiak-an sarato Awak angkek kerah baju Wak agak tenggi.
"Eh Awak lai. Dapek upah baaloh mukasuik Awak tu?" tanyo Apak pangurus tu baliak.
"Iyo tu kan baru Apak pangurus tulihkan honor Imam jo honor Khatib Jumat kini. Honor tu kan samo sajo jo upahnyo," kecek Awak.
"Woi Awak, makonyo agak rajinlah Awak tu ka musajik. Lah lamo honor Imam jo honor Khatib Jumat ko ado mah. Lah babarapo kali baganti pangurus, honor ko alah ado juo mah. Jaan Awak tu asa nan ka mamprotes sajo. Atau adoloh ati Awak tu nan indak sanang ka kami pangurus musajik kampuang ko ndak?" jawek Pak Pangurus musajik mulai naiak darah panehnyo. Ehe, Apak pangurus tu kironyo langsuang pulo dibaehnyo maangkek kerah bajunyo.
"Indak ado Awak mamparotes do Pak. Cuma apo lai ado ayatnyo atau hadisnyo bahaso baibadah wajib tu bisa dibaia upahnyo tu?" tanyo Awak saderhana sajo lai jo hati sarato kapalo nan dingin, tapi tatap Wak angkek kerah baju Wak sakali lai.
