(15) KURENAH AWAK
Ermanto Tolantang
Gara-gara Kunci Oto Ilang, Awak Diberangi Bini
Mungkin dek umua lah batambah juo, sajak siang tadi utak Wak lah kalangsiang pangsiang mancari kunci oto wak nan ilang. Kini ari lah dakek pukua 6. Kerah baju Wak nan tagak kini lah raba. Sabab sabanta lai pastilah langsuang hape Wak badariang-dariang dari bini Wak. Kiro-kiro baitulah parasaian Apak-apak.
"Di mano juo Ayah kini ko. Lah pukua 6 kini ah. Awas kalau ayah matian hape ko. Ayah pasti ka mambuek alasan sadang mambaok oto juo kan? Tolong jawek tanyo Bunda. Di mano Ayah kini nan sabananyo. Baa mangko diam sajo Ayah," kecek bini Wak nan payah mambarantian.
Awak disuruah manjawek, tapi nan bini Wak mancarotet juo. Dunsanak, iko kecek Awak dalam hati sajonyo yo. Jaan disampai-an pulo ka bini Wak. Beko batambah berang bini Wak beko.
"Iyo ko Ayah ka pulang. Tapi kunci oto Ayah ilang pulo ah," kecek Wak nan sabananyo.
"Lah ado pulo alasan baru dek Ayah yo untuak talambek pulang yo. Kini Ayah buek pulo kunci oto ilang lai yo. Atau sabananyo lah bakelok pulo oto Ayah ka rumah ciek lai. Pasti iyo mah. Ko oto Ayah lah bakelok pulo mah. Jaweklah Yah. Iyo eh. Jawek lah Yah. Pasti sajo iyo mah. Awas kalau ndak Ayah jawek iyo," kecek bini Wak jo sagalo tuduhan nan indak bisa dielak-an.
