(13) KURENAH AWAK
Ermanto Tolantang
Kawan Wak Anta Siapo Nan Ditalepon, Babeda Bana Caro Jaweknyo
Sabantako Wak batamu jo kawan lamo. Sasudah tu Wak diajak kawan tu makan siang ka kadai nan manjua nasi jo samba. Rumah makanlah namoe. Kalau ndak Wak jalehan, beko berangloh Awak dek apak ahli bahasa nan di UNP tu beko.
"Iyo Ma. Jadi. Yop. Papa sadang mambaok oto ah. Alah. Alah kan?" jawek Kawan wak ko.
Heran Awak kok bantuak itu capek-capek sajo manjawek talepon. Pakai mangicuah sadang mambaok oto pulo bagai. Nan pasti, dek ba Mama tu pasti sajolah Bininyo nan manalepon. Baru nasi ka disanduak tibo pulo talepon baliak.
"Iyo yang. Sadang di mano kini yang? Alah Yayang makan? Makanlah capek. Jaan sampai talambek makan ndak? Beko sakik Yayang ko. Kalau Yayang sakik, paniang pulo Ayah beko. Yayang kini di mano ko? Sadang di kampus? Lai kuliah tadi Yayang? Rajin-rajinlah Yayang kuliah dih. Yops yops. Da da Yayang...," kecek Kawan Wak tu nan mambuek Awak heran.
Babeda bana 179 derajat caro jawek kawan Wak tu kan. Nan partamo ba Mama sarato capek-capek sajo manjawek. Sadang-an kaduo ba Yayang sarato lunak gigi daripado lidah caro mangeceknyo. Dunsanak ragu Wak. Nan kaduo nan ditalepon Yayangnyo atau Anaknyo tu Dunsanak?
