(12) KURENAH AWAK
Ermanto Tolantang
Lah Wak Kicuah-an jo Harago Tas Murah, Kecek Bini Wak Masih Maha
Untuak manjago harago diri ka kawan sarato untuak manunjuak-an tando Awak lai sayang bini, Wak balianlah tas nan sabana rancak dek Wak lai sadang di Batam jo kawan-kawan.
"Barapo harago tas ko Ayah bali tadi. Jawek jujur yo Ayah," kecek bini Wak sahinggo indak sempat lai maangkek kerah baju Wak.
Walapun tadi kecek panggaleh tas haragonyo 800 ribu, Awak lah sanang bana dapek Wak tawar sahinggo jadinyo 400 ribu. Tapi untuak manyanang-an hati Bini Wak kecek-an harago tas iko murah sabanyak 250 ribu sajo. Ko iyo catatan bana dek Apak-apak, walaupun nan Awak bali maha, harus Wak kecek-an haragonyo murah, supayo sanang ati Bini Wak.
"Murah bananyo harago tas iko Ayah balinyo, Bunda. Tadi Ayah bali cuma 250 ribunyo. Tacaciang buliah dek Ayah kalau maago tas iko," kecek Wak mangicuah-an murah harago tas untuak manyanang-an Bini Wak. Baitulah parasaian Apak-apak.
"Itu maha harago tas iko, Ayah bali mah. Lah kanai kicuah Ayah mah dek urang panggaleh tu. Bisuak kalau pai, indak usah Ayah mambali tas lai. Rancak Ayah agiahkan sajo piti tu ka Bunda lai," kecek Bini Wak sahinggo jarum amper sumangaik Wak lansuang turun ka angko nol. Sakik bana sabananyo ati Wak ko kini mah. Akibaiknyo kini langsuang ilang tanago Wak sahinggo tangan Wak indak talok maangkek kerah baju Wak saketek juo lai. Sadiah bana ati Wak kininyo Dunsanak.
