SUDAH sumbayang subuah pagi tadi, Malanca tamanuang mamikia carito Mak Uniang, tantang nan tajadii maso bagolak dulu.
Wukatu itu Samiak jo Simayin mati basimbah darah di tangah jalan pasawangan. Padohal kaduo urang tu mamacik katua jo wakia katua pamuda nagari.
Pangka bala ulu curito, kato Mak Uniang, karano sabalunnyo, nagari buncah sapanjang hari. Tiok sabanta anak anak bacakak. Tiok malam rumah warga kupak kupak. Hampia tiok pakan urang kamalingan taranak.
Wakatu itu Samiak jo Simayin tasabuik urang bagak nan saliang bamusuhan. Kaduonyo ko pandeka gadang. Kutiko kajadian kacau dalam nagari disampaian urang ka Samiak, inyo lantang manjawek, "Iko anak sabalah nan mambuek ulah. Pasti kalompok si Simayin nan bakarajo." Baitu Samiak marabo satiok ditanyo.
Kutiko sobok pulo jo Simayin, takalo anak nagari mangabakan kajadian nan sarupo, anak nagari manarimo jawek dari pandeka tu, "Sia pulo lai nan mambuek kacau di nagari ko. Jaleh Samiak tu nan punyo ulah. Sudah ko babayia juwo utang dek paja tu." Takah tu bana Simayin mahantam tanah.
Sakali wukatu, tibo siasat anak rundo maintai tangah malam. Ruponyo urang maliang tu babaju itam sarawa itam badeta itam tangah malam. Dicaliak mahandok handok. Diintai di baliak paga. Ruponyo hasia maliang tu dibaoknyo ka rumah tingga. Rumah tu panuah dek padi, bareh, kain bugih sarato hasia curi lainnyo.
Nampak di janjang rumah tu duo pasang tarompa kulik. Nan sarik dipakai urang kampuang maso itu, karano balinyo maha. Nan acok nampak mamakai tarompa tu tiok hari, hanyo Samiak jo Simayin.
Sajak itu bisiak bisiak tajadi dalam kampuang. Anak nagari maangguak angguak mancaliak tando tando nan ado. Samiak jo Simayin mulai dicurigai.
Hari hari bajalan juwo. Pakan baganti bulan. Kahidupan makin paik karano sawah rangkah hari paneh. Taranak murah balai langang. Tangah kampuang taruih juwo tajadi maliang curi.
