(9) KURENAH AWAK
Ermanto Tolantang
Tapaso Awak Batangka jo Buya Soal Kato Sumbayang
Dunsanak, iyo lah acok bana Awak tasuduik soal bahaso; sajak takance dek tukang ojek, takance dek bini, sarato takance dek tukang cukua rambuik. Hari lah patang tadi, iyo sangajo bana Awak turuik apak nan ahli bahasa tu di UNP nak baraja bahasa ko. Hasil baraja tadi langsuang Awak adu kalorok ko jo Buya di musajik sasudah salat magrib tadi.
"Oh baitu pertanyaannyo. Tunggu subanta, lai indak sadang angek kapalo Awak kiniko. Atau lai indak tabaliak pasang baju Awak ko. Atau lai indak tasapo Awak sadang mandi manjalang magrib tadi," kecek Buya tu ka awak.
"Rasonyo badan Awak lai sadang samalero sajo, Buya. Sabab manuruik Awak, kito indak buliah sabananyo sumbayang, bahkan sumestinyo dilarang sumbayang tu," kecek Awak ka Buya tu jo muko nan duorius.
"Tunggu dulu, Awak sarius tampaknyo ma yo? Kini cubo tunjuak-an ka Buya hadis nan malarang kito sumbayang tu?" tanyo Buya tu.
"Buya. Lai tahu Buya arati kato sumbayang tu. Kalau Buya ingin tahu duduak dakek ambo sangenek. Kecek urang ahli bahasa, kato sumbayang adolah samo jo kato sembahyang. Lai tahu Buya jo arati kato sembahyang tu? Aratinyo adolah sembah hyiang atau sembah dewa. Itu indak buliah di ugamo awak do Buya. Dalam ugamo awak nan buliah adolah salat Buya," kecek Awak sadang di ateh angin mambuek Buya tu tamanuang.
