(8) KURENAH AWAK
Ermanto Tolantang
Dek Salah Sangko, Hampia Wak Bacakak jo Urang Bule
Kutiko sabantako awak balanjo di kadai indak jauah dari rumah, hampia wak bacakak jo urang bule bakulik putiah babadan tinggi badagok nan datang ka kadai ko. Anta mangaanyo ka kampuang awak, ambo indak pulo tau doh. Baru masuak ka kadai, langsuang bule tu batanyo. Ambo pun binguang manjaweknyo.
"Adza lemunad?" kecek bule tu. Ambo pun binguang manjaweknyo. Antah iyo inyo mancari aia limun anta mancari Uda Alimunad. Ambo kiro-kiro sajo pasti inyo batanyo Uda Alimunad.
"An struck?" tanyo Bule tu baliak. Ambo agak-agak sajo inyo manyuruah turuik.
"Tidak bisza Tuan. Sawahnyo jauah," kecek ambo. Itu alasan ambo, sabab ambo indak namua Tuan tu pulo nan mamarintah awak.
"And brendy," kecek Tuan Bule tu baliak. Inyo la manyuruah turuik pulo pakai bendi. Iyo indak namua awak do.
"Tidak bisza Tuan. Pamatang sawah tenggi. Beko patah-patah kaki kudo," jawek awak baliak.
