KURENAH AWAK (4)

(4) KURENAH AWAK

Ermanto Tolantang

Wak Bacakak jo Panggaleh Martabak Mesir

Untuak mananangkan ati nan paneh siang tadi, malam ko awak jo bini wak, wak bae mambali martabak di simpang ampek, lai indak

jauh bana dari rumah.

"Diak martabak ciek, nasi goriang pakai talua mato sapi ciek loh. Jaan lupo pakai piriang Diak," mintak awak sarupo urang kayo sambia managak-an kerah baju wak.

"Martabak Mesir Da?" tanyo Adiak panggaleh tu.

"Martabak sajo. Kalau den sabuik Martabak Mesir lamo pulo beko tibonyo. Waang japuik lo ka Mesir dulu martabak tu. Waang kalau maagih namo martabak ko nan ka jeleh-jaleh sajo lah. Beko berang urang ahli bahasa ka waang beko. Tadi gara-gara namo kadai tangkelek sajo lah bacakak den jo urang kadai tu. Mukasuik waang kini ka mancari gara-gara lo jo den ko," kecek wak sambia maangkek kerah baju awak baliak. Tukang martabak tu kini tapaso diam dek lai maraso salah maagiah namo martabak.

Katiko panggaleh tu malatak-an sapiriang martabak kuah jo sapiriang nasi goriang indak pakai talua mato sapi, iyo tabik rabo awak.

"Diak, nasi goriang kok indak waang agiah talua mato sapi? Yo lah kalepor waang lai. Eh yeyai dek waang. Indak mandanga talingo waang tadi. Nasi goriang pakai talua mato sapi. Kan itu kecek den," berang wak jo esmosi nan agak tenggi.