(3) KURENAH AWAK
Ermanto Tolantang
Untuak Malapeh Sakik Ati, Awak Bali 50 Tangkelek Sabalah Kida Sajo
Alun lapeh sakik ati di kadai tangkelek, lah batambah pulo sakik ati jo paja panggaleh tangkelek kaki limo ko. Awak bali tangkelek ciek, nyo agiah sajo ciek sabalah kida.
Untuak malapeh sakik ati, bialah abih pitih awak. Piti paguno untuak palampok malu. Awak bali bana 50 buah tangkelek sabalah kida sajo ka panggaleh kalepor tu.
"In in inndak bisa doh Da," jawek panggaleh kalepor tu tagagok-gagok.
"Indak ado caritonyo dek Waang doh. Tadi Waang jua sabalah kida. Kini den mambali baliak, capek Waang masuakkan ka karuang sabanyak 50 buah. Biah den pakai tangkelek sabalah kida tu tiok hari. Iko pitihnyo harus waang tarimo," kecek Awak jo nada esmosi sahinggo kini mambuek panggaleh tangkelek kalepor tu nan tamanuang. Lah babaleh cakak, baru agak tanang darah wak jadinyo.
