KURENAH AWAK (27)

82 hit
Paskibraka Kota Padang Panjang Dikukuhkan

Ermanto Tolantang

Penulis dan Dosen

(27) KURENAH AWAK

Ermanto Tolantang

Wak Makan ka Kadai, Kasirnyo Saroman Anak Gadih di Kadai Lontong

Siang ko, tando Awak sayang banako ka Bunda, mangko Awak ajak Bunda makan ka rumah makan. Apolai Dunsanak tarui manyuruah Awak untuak maajak Bunda makan ka kadai nasi.

Baru taduduak, mato Awak langsuang tacaliak ka anak gadih rancak di kasir rumah makan ko.

"Onde mande oiii. Ka siko pindah kiroe mah Diak oi. Kok ka rasaki, yo ndak bisa dielak-an kiroe. Batamu juo adiak jo Uda mah," kecek Awak dalam hati sambia manggisa-gisa palipik mato.

Baru sajo salasai palupuak mato tagisah, dek untuang nan ka malang juo, kiroe kasir tu Amak-amak kurui. Aratinyo pancaliak-an tadi hanyo halusinasi Awak sajo. Yo lah melang nasib Awak lai Dunsanak.

"Ka makan Uda?" tanyo adiak tukang edang rumah makan tu mandakek ka Awak.

"Indak. Ka lalok Awak ka siko mah. Eh yeyai dek adiak. Awak masuak ka rumah makan, tantulah pasti ka makannyo," jaleh Awak sambia maangkek kerah baju agak tenggi. Bunda la diam sajo lai.

"Nasi sadang putui. Tunggu subanta yo Da," keceknyo la Awak.

"Jadi sadang mamasak nasi urang dapua kini ko?" tanyo Awak.

"Kami tau jo Apak nan sabananyo. Apak kan Si Awak nan populer di fesbuk tu kan? Apak, jaan cubo-cubo malatuikan badiah ka kami. Sabab kito sapaguruan jo Apak ahli bahasa di UNP tu. Sacaro bahasa, kato mamasak nasi itu salah. Maso nasi nan dimasak. Indak salah dek Apak Awak tu? Nan batua adolah mamasak bareh. Kalau bareh nan dimasak, hasilnyo adolah nasi. Kalau nasi nan dimasak hasilnyo lontong luyaknyo Pak Awak," keceknyo maaja Awak. Bunda tapaso galak-galak ketek dek Awak tasuduik dek batamu jo kaloroknyo bana.

Siang kini yo melang juo badan diri Awak mah Dunsanak. Anak gadih rancak indak juo batamu, nan badan diri dapek loh ajaran dek paja anyia tu.

Komentar

Artikel Terbaru