KURENAH AWAK (26)

190 hit
Paskibraka Kota Padang Panjang Dikukuhkan

Ermanto Tolantang

Penulis dan Dosen

(26) KURENAH AWAK

Ermanto Tolantang

Wah Mantap, Kode Waifi Baganti: Nikahi Awak Dulu

Untuak malapehan uwe-uwe ka raso lamak lontong pagi nan indak jadi kapatang, kini Awak singgah baliak di kadai tu. Apolai kasir padusi nan rancak sarato jo waifi nan perai. Itulah nan manjadi daya tarik pelanggan agaknyo.

Baru awak ka duduak di kadai tu, tampak tulisan nan agak gadang di ateh meja. Pengumuman waifi perai baru diganti urang kadai tampaknyo sajak batangka jo Awak patang.

"Di siko waifi perai. Kode masuaknyo adolah: nikahi awak dulu," tulisan nantun.

Wah mantap. Ikolah nan Awak cari mah. Tabayang sakali adiak padusi rancak tukang kasir kapatang dek Awak. Dunsanak untuak sakali kini tolong jaan disampaikan ka Bunda. Kok ka lalok gai Awak di lantai surang bialah. Nan jaleh suasana rancak kini agaknyo sadang bapihak bana ka Awak.

Sambia maangkek kerah baju, Wak mintak adiak tukang edang lontong tu maimbau adiak rancak kasir kapatang tu. Rancana Awak tantulah ka mamanuhi pamintaan tu untuak manikahinyo.

"Diak, tolong imbauan kasir kadai ko lah," parintah Awak ka adiak tukang antahan lontong tu.

Indak lamo sudah tu datanglah Amak-amak gapuak badagok. Jantuang Wak langsuang takajuik. Kecek Awak pastilah Amak dari gadih rancak nan jadi kasir patang mah.

"Iyo Uda. Ambo kasir di siko kini Uda. Ambo nan mangganti kode masuak waifi tu mah Uda. Iyo lai ka manikah jo Ambo, Uda? Lakehlah Uda. Uda kiroe mah jodoh Ambo," kecek Amak gapuak badagok tu.

Onde maaaaak ai. Lah salah kiroe Awak, Dunsanak. Awak bae langkah saribu, Wak tinggakan kadai tu. Untuak nan kaduo kali ko, tapaso indak jadi juo Awak makan lontong.

Komentar

Artikel Terbaru