(14) KURENAH AWAK
Ermanto Tolantang
Gara-gara Wak Mintak Stempel, Wak Bacakak di Kantua Lurah
Pagiko Wak ba-urusan di kantua lurah. Sanang bana ati Wak. Pak Lurahnyo elok bana sarato pelayanan nan mamuaskan dek Pak Lurah. Baru sajo Pak lurah malakek-an tando tangan di surek blangko nan Wak urus, langsuang batanyo ka Wak jo sagalo karamahtamahannyo.
"Masih ado nan bisa ambo bantu Pak?" tanyo Pak Lurah ka Awak sacaro ramah.
"Cukuik Pak Lurah. Maurus surek iko sajo nyo Pak Lurah," kecek Wak labiah ramah lai.
"Kalau baitu, mintak stempel ka Apak Sekretaris Lurah di ruang sabalah dih. Maaf dih, ambo harus ka kantua camat pagi ko ah," jaleh Pak Lurah sabana ramah ka rakyaik badarai bantuak awak ko.
Sasudah Pak Lurah pai, langsuang Wak manamui Pak Sekretaris sambia maangkek kerah baju Wak nan lah tagak dek Wak suruah Bunda maagiah lem parancih ka kerah tu dan digosok rancak.
"Mintak stempel Pak Sekretaris," kecek Awak.
"Kalau Apak mintak stempel, iyo indak bisa do Pak," kecek Pak Sekretaris tu nan mambuek Wak heran.
"Kan Pak Lurah nan manyuruah Awak mintak stempel ka Apak subantako mah," kecek Awak jo spaning Wak nan mulai naiak.
"Apak Batuah. Tapi peraturan di kantua lurah ko, rakyaik indak buliah mamintak stempel di kantua ko," kecek Pak Sekretaris nan mambuek samakin tabik suga Wak.
"Baaloh palayanan Apakko. Babeda bana jo caro pelayanan Pak Lurah tadi mah. Mantang-mantang Awak rakyaik badarai yo Pak sahinggo Apak sawenang-wenang sajo ka Awak," kecek Wak sambia maangkek kerah baju Wak nan lah tagak juo sakali lai.
"Pak, kalau Apak mamintak stempel kami, malah perbuatan Apak nan sawenang-wenang ka rakyai ko," kecek Pak Sekretaris nan manambah Awak samakin binguang.
"Baa lo Apak manyalah-an Ambo. Apak batambah mancari ilik-ilik pagi ko yo," kecek Wak.
"Pak ambo bajeleh-jaleh sajo. Stempel kami cieknyo. Kok Apak mintak lo stempel kami ko, baa pulo kami manstempel surek-surek nan ado di kantua lo lai. Kalau surek Apak, bia kami agiah jajak stempelnyo kini," jawek Apak tu sahinggo mambuek Awak tapurangah sambia maraso salah dek masih alun dalam kaji Awak.
Baru takana nan bana. Tampaknyo, tapaso Awak acok-acok baraja baliak ka Apak ahli bahasa nan di UNP tu. Kini ko kerah baju Wak langsuang takulai walaupun tadi lah tagak kareh.
Komentar