(11) KURENAH AWAK

Ermanto Tolantang

Hampia Awak Bacakak jo Bini Wak

Sakiro pukua satangah limo sasudah salat asar, Awak caliak sakaliliang rumah tanyato lah ditingga-an bini Awak. Wak angkek kerah baju Wak, Wak bae tagak patentang-patenteng ka sagalo suduik rumah, iyo ruponyo Awak lah ditingga-an bini. Wak bae maratok dalam hati.

"Onde Bunda. Apo bana salah Ayah, kok Ayah batingga-an surang. Kok coiko bisa gilo Ayah ma ditingga-an Bunda. Indak talok dek Ayah iduik surang do ditingga-an Bunda," ratok Awak baibo ati.

Indak lamo Awak tadiam dek lah panek dek maratok surang, tibo-tibo datanglah Bunda. Baru tabik baliak sumangaik iduik Awak.

"Dari mano Bunda ko Bunda? Baa mangko pai surang sajo Bunda sakali kini. Pai mambali martabak saminggu nan lalu lai jo Ayah. Baa mangko kini indak? Apo bana salah Ayah ko dek Bunda?" tanyo Awak ka Bunda.

"Mulai sajak kini labiah rancak Ayah indak ikuik babalanjo jo Bunda lai. Sabab kalau Ayah ikuik, pastilah Ayah bacakak baliak jo urang panggaleh tu," kecek Bini manuduah Wak sacaro langsuang.

"Indak mungkinlah Ayah bacakak jo urang panggaleh tu, Bunda," jawek Awak.

"Pasti sajo Ayah ka bacakaknyo. Apolai, kapatang ayah lah manuruik nan urang ahli bahasa tu baliak ka UNP. Hasil baraja Ayah tu hasilnyo Ayah bacakak jo urang panggaleh," jawek bini Wak.

"Memangnyo apo nan Bunda bali tu?" tanyo Awak heran.

"Pokoknyo Ayah jaan berang. Walaupun mie nan Bunda bali ko di simpang ampek, tapi namonyo tatap mie aceh. Walaupun mie ko dibuek di kampuang kito, katiko mambali tatap Bunda mamasannyo mie aceh. Jaan banyak carito lo Ayah lai," kato Bini Wak sambia manutuik muluik wak kuek-kuek tando Awak indak buliah berang.

Dek karano itu, Awak mulai agak manyarah sajo lai ka bini Awak, sambia manurunkan kerah baju Awak baliak. Catatan nan paralu bana diingek adolah ka bini Awak jaan sakali-kali maraso manang. Bialah awak nan mangalah.