(10) KURENAH AWAK

Ermanto Tolantang

Buya Maraso Tasuduik dek Awak, Soal Kaji

Pagiko di wakatu subuah, baru sajo Buya salasai maagiah santapan rohani, Awak langsuang duduak dakek Buya. Baru sajo, Awak mandakek, Buya langsuang mangecek.

"Masih ado ceramah Buya tadi nan salah dek Awak? Buya kan lah baulang-ulang manggunokan kato salat tadi mah. Buya indak ka manggunokan kato sumbayang lai," kecek Buya mambela diri. Awak tagalak sangenek sambiah maangkek kerah baju Awak surang.

"Masih ado Awak nan indak sapandapek jo Buya," kecek Awak sacaro santun.

"Oooo berarti Awak lah babeda surau jo babeda guru mah jo Buya. Soal apo tu Awak nan indak sapandapek jo kaji Buya tadi?" tanyo Buya.

"Awak indak satuju jo Buya nan mangato-an bahaso salat itu adolah hal nan partamo dalam iduik sasuai jo ajaran agamo kito," kecek Awak.

"Mukasuik Awak. Pandapek jo kaji Buya tadi salah?" tanyo Buya ka Awak.

"Kaji Buya nan mangatokan salat adolah nomor satu manuruik ugama itu indak salah, tapi sabana salah," kecek Awak mambuek Buya tatagun sarato agak manggaretek. Makonyo, Awak langsuang maangkek kerah baju Awak baliak.

"Jadi manuruik Awak nan nomor satu itu apo?" tanyo Buya sahinggo Awak maraso sadang di ateh angin.

"Buya kalau manuruik Awak, kaji nan batua adolah salat tu harus nomor duo," kecek Awak tagantuang.

"Ah iyo lah pasiak Awak lai. Lai mandi Awak tadi untuak pai ka salat subuah ko? Lai indak tabaliak baju Awak kini ko? Cubo rasok kapalo Awak lai indak sadang angek ko?" tanyo Buya nan sadang maragukan kaadaan jiwa Awak.

"Buya, Awak sarius mah. Sabab manuruik ugamo kito kaji nan batua tu, salat tu tatap nomor duo. Sabab nomor satu adolah syahadat. Nomor tigo adolah puaso. Nomor ampek adolah bazakat. Nomor limo adolah malakukan haji," kecek Awak tatap sambia maangkek kerah baju Wak.

"Eh kalepor jo kalepir dek Awak mah. Kok itu lai jaleh dek Buya mah," kecek Buya.

"Sabantako adolah batambah kasalahan Buya. Sadang di dalam musajik, sumestinyo Buya indak buliah mengecek kalepor jo kalepir. Kalau ambo tantu buliah," kecek Awak mambuek Buya makin tapurangah.