(6) KURENAH AWAK
Ermanto Tolantang
Wak Bacakak jo Bini, Wak Mintak Mie Goriang, Nyo Agieh Mie Abuih
Dek kanai semprot angek dek tukang ojek online tadi, yo indak tamakan lontong pagi tu sampai kini dek awak do. Siang ko Wak mintak bini mambuekkan mie goriang duo buah. Raso kalamak makan mie goriang di hari angek manjalang sumbayang lohor ko.
Kutiko bini wak maidang-an sapiriang mie mambubuang tenggi tu, langsuang manggalagak darah wak. Baa kaindak dek dunsanak, jaleh sajo tadi wak mintak mie goriang, nyo nonyok-an mie sudah abaabui jo ayia nan alah bakariang-an.
"Bunda baa mangko engak bana Bunda kini. Jaleh ayah tadi minta mie goriang. Iko mie abuih namoe ko mah Bunda. Indak mandanga kecek Ayah, kini Bunda lai. Ka mano sajo pangana Bunda tadi ko," kecek awak mamberang-an bini wak sambia maangkek kerah baju wak nan alah tagak juo sajak tadi.
"Apo kecek Ayah?" kecek bini awak jo suaro kareh mulai manggalagak. "Engak? Indak Ayah nan Engak kini ko. Lai tau ayah mambaco bungkui mie ko. Tatulie mie goriang. Cubo gadangkan incek mato ayah lah. Caro mambueknyo abui dulu jo ayia, buang ayianyo, agia bumbunyo. Iko jadinyo, mie goriang sapiriang mambubuang ko," kecek bini wak berang-berang.
"Jadi kini mie goriang ko indak bagoriang lai yo Bunda?" kecek awak agak kuyu.
"Indak usah ayah mambanta lai. Kini mie goriang nan baabui ko bia Bunda nan mamakan. Kalau Ayah nio mie goriang nan bagoriang, buek dek Ayah di dapua surang," kecek bini mambuek wak tamanuang.
Komentar