(5) KURENAH AWAK
Ermanto Tolantang
Kecek Awak di Banda Luruih, Tibo Tukang Ojek Nyo Marabo-rabo
Dari pado awak batangka sarato bacakak tarui jo urang panggaleh, untuak mambali lontong pagi ko awak cubo lai bapasan jo tukang ojek online. Iko untuak manghindari esmosi jo kastrol awak indak tenggi tarui. Lah awak agiah tau alamat ka tukang ojek online; banda lurui, balakang kantua balai kota, kecek wak.
Baru sajo wak tunggu di muko rumah, tibolah tukang ojek online ko. Inyo langsuang marabo-rabo, sambia maangkek kerah bajunyo sarato mato nan agak merah sangenek. Mudah-mudahan mato merah tu dek angin pagi sajo.
"Iko iyo pasanan lontong Apak kan? Lah babaliak-baliak ambo lewat di siko tadi. Kecek apak tingga di Banda Lurui. Maanyo Banda lurui tu Pak?" tanyo inyo jo intonasi mulai agak tenggi.
"Iko Banda Lurui, namo daerahnyo mah Uda. Itu kan bandanyo, di muko rumah awak tu," kecek awak jo ati nan saba.
"Ka mano incek mato Apak ko. Sajaleh tu bakelok-kelok banda ko, Apak kecek-an iko Banda Luruih. Iyo indak masuak carito Uda iko do. Kok awak sampaian ka ahli bahasa di UNP tu, iyo kanai berang Apak mah. Alah sakali ko, Apak mangecek mah. Ko barang Apak. Maabih wakatu ambo sajo Apak mah," kecek tukang ojek tu langsuang pai.
Bamimpi apo ambo samalam ko dunsanak? Pagi-pagi lah dapek lamang angek sajo dek tukang ojek. Iyo agak tamanuang pagi kini ambo dunsanak.
Komentar